Азербайжандын Гянджа шаарында өткөн Көз карандысыз мамлекеттер шериктештигинин (КМШ) оюндарында кыргызстандык спортчу Аяна Асамаликова эркин күрөш боюнча кыз-келиндер арасындагы мелдеште алтын медаль тагынды. Бул тууралуу турнирдин уюштуруучулары кабарлашты.
Мелдеш 3–6-октябрь күндөрү өтүп, Асамаликова 69 килограмм салмакта атаандаштарын утуп, чемпион аталды.
Мындан тышкары, кыргызстандык дагы үч балбан коло медалга ээ болушту:
- Асема Төрөгелдиева — 53 кг
- Сезим Жолдошбекова — 57 кг
- Акылай Чыныбаева — 61 кг
КМШ оюндарында Кыргызстандын кыз-келиндер курама командасын машыктыруучу Нурсултан Аскарбеков жетектеди.
Бул жеңиш кыргызстандык спортчулардын эл аралык аренадагы ийгиликтеринин дагы бир далили болуп саналат.