Кыргызстанда акыркы 24 сааттын ичинде төртүнчү жер титирөө катталды. Бул тууралуу Улуттук илимдер академиясынын Сейсмология институту маалымдады.
Маалыматка ылайык, жер титирөө 23-октябрда саат 22:44тө болуп, анын күчү Рихтер шкаласы боюнча 3,0 баллга жеткен. Сейсмикалык термелүүнүн очогу Кара-Күнгөй айылынан 12 чакырым түштүк-чыгышта, Кара-Саз айылынан 15 чакырым түштүк-чыгышта жана Кочкор айылынан 25 чакырым түштүк-чыгышта жайгашкан.
Жергиликтүү тургундар сезген жер титирөөнүн күчү болжол менен 2,5 балл болгон.
Эске сала кетсек, 22–23-октябрь күндөрү да өлкө аймагында үч жер титирөө катталган:
-
саат 13:20да – Тогуз-Булак айылынан 20 чакырым түштүк-батышта (3,5 балл);
-
саат 13:33тө – Өзгөрүш айылынан 30 чакырым түштүк-чыгышта (3,0 балл);
-
саат 20:04тө – Өзгөрүш айылынан 25 чакырым түштүк-чыгышта (3,5 балл).
Адистердин айтымында, бул жыш жер титирөөлөр сейсмикалык активдүүлүктүн жогорулашын көрсөтүп турат. Учурда кыйроо же адам өмүрүнө зыян келтирүү боюнча маалымат түшкөн эмес.