IV Элдик курултай жогорку деңгээлде уюштурулуп, ийгиликтүү жыйынтыкталды. Бул тууралуу мамлекеттик катчы Арслан Койчиев Токтогул Сатылганов атындагы Кыргыз улуттук филармониясында өткөн Элдик курултайдын жүрүшүндө билдирди.
Анын айтымында, курултай эл менен түздөн-түз байланыш түзүүгө мүмкүнчүлүк берип, жарандардын пикирлери жана сунуштары угулду. Курултай институтунун коомдогу орду жылдан-жылга бекемделип баратканы байкалууда.
«Делегаттардын өзүн алып жүрүү маданияты өстү. Эгер мурда негизинен жергиликтүү маселелер көтөрүлсө, быйыл улуттук деңгээлдеги көйгөйлөр да активдүү айтылды. Бул коомдогу аң-сезимдин өсүп жатканынан кабар берет. Аң-сезим өскөн сайын курултай институтунун мааниси артып, көтөрүлгөн маселелердин актуалдуулугу да жогорулайт. Келечекте мындан да олуттуу маселелерди көтөрөбүз деген ишенич бар», — деди мамлекеттик катчы.
Белгилей кетсек, Элдик курултай коом менен бийликтин ортосундагы ачык диалогду камсыздоочу маанилүү аянтча болуп саналат.