АКШнын Конгрессинин кароосуна “Гренландияны аннексиялоо жана ага штаттын статусун ыйгаруу” жөнүндөгү мыйзамдын долбоору кечээ киргизилди. Бул маалымат Кошмо Штаттардын Өкүлдөр палатасынын сайтында жарыяланды (https://fine.house.gov/news/documentsingle.aspx?DocumentID=118)
Долбоорду демилгелеген конгрессмен Рэнди Файн “Ким Арктиканы көзөмөлдөсө, ал АКШ үчүн стратегиялык мааниге ээ арктикалык маршруттарды жана коопсуздук архитектьурасын көзөмөлдөйт. Андыктан АКШ аймакты Американын баалуулуктарын сыйлабаган жана коопсуздукту камсыздоого жараксыз субъекттердин колунда калтыра албайт” деген билдирүүсүн жазды.
Документтин негиздемесинде мыйзам АКШ Гренландияны биротоло ээлеш үчүн зарыл кадамдардын баарына барууга жол ачат деп жазылган. Долбоордо Гренландияга Амерниканын бир штаты катары статус берүүнүн жагдайлары да көрсөтүлгөн.
Гренландия учурда Даниянын курамындагы автоном аймак. Дания Королдугу менен АКШнын 1951-жылы НАТО боюнча союздаштык милдеттенмелер тууралуу документке кошумча Гренландияны коргоо жөнүндө келишимге кол коюшкан. Ал келишимге ылайфык, АКШ Гренландияны тышкы агрессиядан коргоо милдеттенме алган эле.
Гренландия маселеси Вашингтон тараптан улам көтөрүлүп келген. Дональд Трамптын президенттик биринчи мөөнөтүндө да кайра козголуп барып токтогонсуган. Эми Гренландияга доомат кайра жаңы күчкө ээ болду. Вашингтон сатып же тартып алам, айтор Гренландияга кандай да болсо ээлик кылам, эгер Дания макул болбосо, катаал соода режимин киргизүүдөн тартып башка чечкиндүү кадамдарга барабыз деген билдирүүлөр Вашингтон тараптан соңку кезде улам айтыла баштаган болчу.