31-декабрда президент Садыр Жапаров “Салык салуу, социалдык камсыздандыруу жана салыктык эмес кирешелер чөйрөсүндөгү айрым мыйзам актыларына өзгөртүүлөрдү киргизүү жөнүндө” мыйзамга кол койду. Документ 2025-жылдын 1-январынан тарта күчүнө кирди.
Аталган мыйзам ишкерлерге, юридикалык жана жеке жактарга бир катар салыктык жана камсыздандыруу жеңилдиктерин берүү максатында иштелип чыгып, президенттин 2025-жылдын 5-декабрындагы “Экономиканын айрым тармактарын колдоо боюнча чаралар жөнүндө” жарлыгын ишке ашырууга багытталган.
Мыйзамда каралган негизги жеңилдиктер:
зергерчилик өндүрүшү үчүн арналган жабдууларды, технологияларды, реактивдерди жана жарым фабрикаттарды импорттоодо кошумча нарк салыгы алынды;
2029-жылдын 1-январына чейин транспорт каражаттарын сатууда юридикалык жана жеке жактар салык төлөөдөн бошотулду;
2026-жылдын 1-январына чейин транспорт каражаттарын кайра экспорттоодон улам пайда болгон жеке жактардын салыктык карыздарын эсептен чыгаруу каралган;
ишканалар тарабынан өндүрүлгөн жана/же чогултулган транспорт каражаттарын жана аларга тиешелүү комплект буюмдарды сатуудан салык алынбайт;
2030-жылдын 1-январына чейин тигүү жана текстиль өнөр жайында иштеген кызматкерлер үчүн киреше салыгынын минималдуу өлчөмү 1 пайыз болуп белгиленди, ошондой эле камсыздандыруу төгүмдөрүнүн бирдиктүү ставкасы киргизилди;
мүлкүн ижарага берген жарандар үчүн камсыздандыруу төгүмдөрү жеке ишкерлерге теңештирилип, орточо айлык акынынын кыскартылган суммасынын 6 пайызы өлчөмүндө аныкталды;
Кыргызстандын аймагынан тышкаркы ишмердүүлүк үчүн бирдиктүү салыктын ставкасы 0,1 пайызга чейин төмөндөтүлдү (мурун 1 пайыз болчу);
чет өлкөлүк банктар аркылуу жүргүзүлгөн транзакциялар үчүн салыктын ставкасы 0,1 пайызга чейин азайтылды (мурун 0,2 пайыз);
баалуу металлдардан жасалган зер буюмдардын мурда импорттолгон же өндүрүлгөн калдыктарын 2 айдын ичинде легалдаштыруу каралып, бул мөөнөттө салык текшерүүлөрүнө мораторий киргизилди;
алкоголдук продукцияны чекене сатууга берилүүчү лицензия жоюлду;
салыктык талаштарды арбитраждык соттордо кароо алып салынды.
Укук бузуулар жөнүндө кодекске киргизилген өзгөртүүлөр:
зергерчилик буюмдары менен атайын эсепке турбастан иш жүргүзгөндөр үчүн жоопкерчиликти караган жаңы берене киргизилди
(жеке жактар үчүн айып пул — 5 миң сом, юридикалык жактар үчүн — 13 миң сом);ЕАЭБге мүчө мамлекеттердин чек арасы аркылуу товарларды жана транспорт каражаттарын мыйзамсыз алып өткөндүгү үчүн 311-берене боюнча айып пулдар көбөйтүлдү.
Жеке жактар үчүн — 20 миң сомго чейин, юридикалык жактар үчүн — 65 миң сомго чейин;жыл ичинде кайталап бузуу болгондо айып пулдар дагы жогорулап, товарларды жана транспорт каражаттарын конфискациялоо каралган.
Белгилей кетсек, аталган мыйзам 2025-жылдын 24-декабрында Жогорку Кеңеш тарабынан кабыл алынган.