Кытай өкмөтү чакан жана орто жеке ишканаларга инвестициялык колдоо көрсөтүү максатында көлөмү 500 млрд юанды (болжол менен 71,42 млрд АКШ доллары) түзгөн атайын кепилдик программасын ишке киргизгенин шейшемби күнү расмий жарыялады.
Маалыматка ылайык, программа Мамлекеттик каржылоо кепилдик фонду аркылуу эки жылдык мөөнөттө ишке ашырылат. Ал орто жана узак мөөнөттүү насыяларды гана эмес, ошондой эле ишканалардын өндүрүштүк-чарбалык ишмердүүлүгүнө байланыштуу каржылоо муктаждыктарын да камтыйт.
Тактап айтканда, каражаттар завод имараттарын кеңейтүүгө, соода түйүндөрүн оңдоого, ошондой эле айланма каражаттарды толуктоого багытталат. Бул тууралуу Кытай Эл Республикасынын Каржы министрлиги башка борбордук ведомстволор менен биргеликте тараткан циркулярда айтылат.
Белгиленгендей, аталган чара жеке секторду колдоого, ишкердикти өнүктүрүүгө жана экономиканын туруктуу өсүшүнө түрткү берүүгө багытталган.