Армения менен Азербайжандын өкүлдөрү Азербайжандын аймагы аркылуу Арменияга темир жол менен суюлтулган газ жана битум жеткирүү боюнча макулдашууга жетишти. Бул тууралуу Армениянын экономика министри Геворг Папоян билдирди.
Министрдин айтымында, жетишилген макулдашуу армениялык ишкерлер үчүн жаңы мүмкүнчүлүктөрдү ачат.
«Биздин ишкерлер бул мүмкүнчүлүктөн пайдалана алышат», — деп жазган Г. Папоян социалдык тармактагы баракчасында.
Белгилей кетсек, 2025-жылдын декабрь айында Арменияда суюлтулган газды импорттоодо кыйынчылыктар жаралган. Бул Ирандагы окуяларга, ошондой эле Россия менен Грузиянын чек арасындагы Жогорку Ларс өткөрмө пунктунун өткөрүү мүмкүнчүлүгүнүн төмөндөшүнө байланыштуу болгон.
Эске салсак, өткөн жылдын октябрь айында Армения менен Азербайжандын жетекчилери бири-биринин аймагы аркылуу жүк транзитине коюлган чектөөлөрдү өз ара алып салуу тууралуу билдиришкен. Андан бери Азербайжандын аймагы аркылуу Арменияга айрым жүктөр жеткириле баштаган.