Садыр Жапаров 12-февралда Азия инфраструктуралык инвестициялар банкынын президенти Цзоу Цзяини кабыл алды.
Жолугушууда өлкөнү индустриялаштыруу, транспорттук-логистикалык байланыштарды өнүктүрүү жана транзиттик потенциалды чыңдоо боюнча ири долбоорлор талкууланды. Мамлекет башчысы кошумча наркы жогору өндүрүштөрдү өнүктүрүү, кайра иштетүүнү кеңейтүү жана өнөр жайды модернизациялоо маанилүү экенин белгиледи.
Ошондой эле транспорт инфраструктурасын жакшыртуу, Кыргызстанды региондук хабга айландыруу жана энергетика тармагын өнүктүрүү маселелерине өзгөчө көңүл бурулду. Айрыкча Камбар-Ата – 1 ГЭСи жана Кытай – Кыргызстан – Өзбекстан темир жолу долбоорлору талкуунун чордонунда болду.
АИИБ Кыргызстанды стратегиялык өнөктөш катары баалап, артыкчылыктуу багыттар боюнча кызматташууну жана долбоорлорду каржылоону улантууга даяр экенин билдирди.