Жогорку Кеңештин жыйынында парламент төрагасынын кызмат ордуна Марлен Маматалиевдин талапкерлиги каралып, депутаттар жашыруун добуш беришти. Түзүлгөн эсептөө комиссиясы добуштарды санап чыгып, жыйынтыгын жарыялады.
Ага ылайык, 77 депутат “макул”, 5 эл өкүлү “каршы” деп добуш берип, Марлен Маматалиев Жогорку Кеңештин төрагасы болуп шайланды.
Марлен Маматалиев 1981-жылы 24-мартта Бишкек шаарында төрөлгөн. Ал Исхак Раззаков атындагы Кыргыз техникалык университетинин Маалыматтык технологиялар факультетин аяктаган. Мурдагы вице-премьер-министр Абдырахман Маматалиевдин уулу.
Эмгек жолун Социалдык фонддон баштап, кийин Экономика жана Финансы министрликтеринде иштеген. 2009–2010-жылдары ошол кездеги биринчи вице-премьер-министр Акылбек Жапаровдун кеңешчиси болгон. Андан соң өкмөттө иштеп, жеке ишкерлик менен алектенген.
2018-жылы Жогорку Кеңештин VI чакырылышына “Республика – Ата Журт” партиясынан депутат болуп шайланган. 2020-жылкы парламенттик шайлоого “Мекеним Кыргызстан” партиясынан катышкан. 2021-жылы “Ынтымак” партиясын Жогорку Кеңешке баштап келип, депутаттык мандатка ээ болгон.