Эдил Байсалов — Кыргыз Республикасынын Министрлер Кабинетинин Төрагасынын орун басары — Мекин Мустафа Кемаль Окем, Түркия Республикасынын Кыргыз Республикасындагы Атайын жана Ыйгарым Укуктуу Элчиси менен жолугушту.
Жолугушуунун жүрүшүндө Эдил Байсалов Кыргызстан боордош Түркия Республикасы менен кызматташтыкты ар тараптуу чыңдоого өзгөчө маани берерин белгиледи. Ал эки өлкөнү бекем тарыхый, маданий жана руханий байланыштар бириктирип турарын айтып, мындан ары да стратегиялык өнөктөштүктү тереңдетүү зарылдыгын баса белгиледи.
Тараптар эки мамлекет ортосундагы соода-экономикалык байланыштарды туруктуу жана сапаттуу өнүктүрүүгө кызыкдар экенин билдиришти. Ошондой эле саламаттыкты сактоо, маданият жана билим берүү тармагындагы кызматташтык маселелери кеңири талкууланды.
Өз ара пайдалуу кызматташтыкты натыйжалуу ишке ашырууга негиз түзгөн эки тараптуу келишимдик-укуктук базаны андан ары өнүктүрүүнүн маанилүүлүгүнө өзгөчө көңүл бурулду.
Жолугушуунун жыйынтыгында тараптар конструктивдүү диалогду улантууга жана өз ара кызыкчылык жараткан багыттар боюнча эки тараптуу байланыштарды кеңейтүүгө даяр экендиктерин билдиришти.