Балдарга арналган “Байчечекей” журналы тууралуу роликтер эми Кыргызстандагы кинотеатрларда көрүүчүлөргө тартууланат. Бул тууралуу Маданият, маалымат, спорт жана жаштар саясаты министрлигине караштуу Кинематография департаментинин директору Талантбек Төлөбеков билдирди.
“Кыргыз Туусу” маалымат-басма үйү менен Кинематография департаменти кызматташуу тууралуу макулдашышты. Ага ылайык, “Байчечекей” балдар журналын жарнамалаган роликтер өлкөнүн кинотеатрларында акысыз көрсөтүлүп турат.
“Байчечекей” — бала бакча жана башталгыч класс курагындагы балдарга арналган, түстүү сүрөттүү, адабий-көркөм журнал. Айына бир жолу 5000-6000 тираж менен чыгат.