Иран тургундары перс жаңы жылы — Нооруз (Навруз) алдында белгиленчү салттуу Чахаршанбе-Сури майрамын белгилешти.
Бул байыркы майрамда адамдар көчөгө чыгып, от жагып, анын үстүнөн секирип, жаздын келишин жана табияттын жаңылануусун тосуп алышат.
Бийлик фейерверктерге тыюу салганына карабастан, майрам өлкөнүн ар кайсы шаарларында өткөрүлдү. Акыркы жылдары жаштар бул күндү саясий нааразычылыгын билдирүү үчүн да колдонуп келишет.
Маалыматтарга караганда, АКШ жана Израиль менен болгон чыңалууга карабастан, эл салтты улантты. Айрым социалдык тармактарда коопсуздук күчтөрүнүн майрамды чектөө аракеттери тартылган видеолор тарады.
Ошондой эле, Ирандын акыркы шахынын уулу Реза Пехлеви элди майрамдоону токтотпоого чакырса, Израилдин премьер-министри Биньямин Нетаньяху ирандыктарга кайрылуу жасап, көчөгө чыгып майрамдоого үндөгөн.
Эксперттер бул майрам быйыл жөн гана маданий иш-чара эмес, коомдогу маанайдын жана саясий кырдаалдын көрсөткүчү болуп калганын белгилешүүдө.