Бүгүн Черногориянын тышкы иштер министри Эрвин Ибрагимовичтин расмий сапарынын алкагында Кыргызстанда аталган өлкөнүн Ардактуу консулдугу ачылды.
Ачылыш аземинде консулдук эки өлкөнүн жарандары жана бизнес-коомчулугу ортосундагы байланыштарды чыңдоочу маанилүү практикалык көпүрө болору белгиленди. Иш-чарага Тышкы иштер министрлигинин өкүлдөрү, Черногориядан келген делегация жана кыргызстандык ишкерлер катышты.
Жаңы дайындалган ардактуу консул Бекназар Асанов консулдуктун негизги максаты экономикалык кызматташтыкты өнүктүрүү экенин билдирди.
Анын айтымында:
- эки өлкөнүн ишкерлеринин байланышын кеңейтүү иштери жүргүзүлөт;
- Черногориядан инвесторлор Кыргызстанга кызыгуу көрсөтүүдө;
- жакын арада ири бизнес-форум өткөрүү пландалууда;
- түз авиакаттамдарды ачуу маселеси каралууда.
Ошондой эле Черногория тарап кичи ГЭСтерди куруу, курулуш жана өндүрүш тармактарына инвестиция салууга кызыкдар экени айтылды.
Учурда эки өлкөнүн Соода-өнөр жай палаталары сүйлөшүүлөрдү жүргүзүп, кызматташтыкты кеңейтүү багытында иш алып барууда.