2-апрелде таңкы саат 05:28де Ош облусу аймагында күчү 4,5 баллга жеткен жер титирөө болду. Бул тууралуу Улуттук илимдер академиясынын Сейсмология институту маалымдады.
Адистердин айтымында, жер титирөөнүн очогу Өзгөн шаарынан 3 чакырым түштүк-батышта жайгашкан. Ошондой эле очок Мырза-Аке айылынан 6 чакырым, Куршаб айылынан 5 чакырым аралыкта катталган.
Жер титирөө калктуу конуштарда ар кандай деңгээлде сезилди. Тактап айтканда, Өзгөн шаарында жана Мырза-Арык, Кароол айылдарында силкинүү 4,5 баллга жакын болду. Куршаб, Мырза-Аке, Красный-Маяк айылдарында 4 балл, ал эми Кара-Суу шаарында жана айрым айылдарда 3,5 баллга чейин сезилди.
Мындан тышкары, Ош, Жалал-Абад жана Көк-Жаңгак шаарларында жер титирөө 3 балл деңгээлинде байкалган.
Алдын ала маалымат боюнча, жабыркагандар жана кыйроолор тууралуу маалымат катталган жок.