Кыргыз Республикасынын Министрлер кабинетинин төрагасы Адылбек Касымалиев Азербайжан Республикасына болгон иш сапарынын алкагында Баку шаарындагы Гейдар Алиев борборуна жана Азербайжандын Улуттук килем музейине барды.
Сапардын жүрүшүндө өкмөт башчысы аталган маданий жайлардын ишмердүүлүгү, архитектуралык өзгөчөлүктөрү жана көргөзмөлөрү менен таанышты. Айрыкча, Гейдар Алиев борборунун заманбап архитектурасы жана көп функционалдуу маданий мейкиндик катары мааниси белгиленди. Ошондой эле делегация Азербайжандын Улуттук килем музейинде болуп, өлкөнүн бай тарыхын жана маданий мурасын чагылдырган экспонаттарды көрдү. Бул музейде миңдеген уникалдуу килемдер жана кол өнөрчүлүк буюмдары сакталат.
Белгилей кетсек, Адылбек Касымалиев 1–2-апрель күндөрү Азербайжанга болгон иш сапарынын алкагында Түрк мамлекеттер уюмунун мүчө өлкөлөрүнүн өкмөт башчыларынын жыйынына катышууда.