Жогорку Кеңеш депутаттары “Тышкы миграция жөнүндө” мыйзамга өзгөртүүлөрдү үчүнчү окууда кабыл алышты.
Мыйзам долбоорунун негизги максаты — 16 жашка чейинки Кыргызстандын жарандарына жалпы жарандык паспорт алуу жол-жобосун жөнөкөйлөтүү.
Жаңы тартипке ылайык, эми балага паспортту ата-энесинин биринин арызы менен эле алуу мүмкүн болот. Буга чейин документти тариздөө үчүн эки ата-эненин тең макулдугу талап кылынчу.
Демилгечилер белгилегендей, көп учурда ата-энелердин бири чет өлкөдө болуп, байланышка чыкпай же тарбияга катышпай калган учурлар кездешет. Мындайда экинчи ата-эне сотко кайрылууга аргасыз болчу.
Ошол эле учурда бул жеңилдетүү паспорт алууга гана тиешелүү. Баланын чет өлкөгө чыгуусу үчүн мурдагыдай эле эки ата-эненин макулдугу талап кылынат.
Жаңы норма чет өлкөдө жүргөн жашы жете элек кыргызстандыктарга жайылтылбайт. Аларга паспорт алуу үчүн эки ата-эненин макулдугу сакталат.