Москванын экинчи Батыш райондук аскер соту Кыргызстандын жараны Абдинасир уулу Бекзатты Крокус Сити Холлдогу окуя боюнча «терроризмди актоо» тууралуу пикири үчүн күнөөлүү деп тапты. Бул тууралуу ТАСС кабарлады.
Агенттиктин маалыматына ылайык, ал телеграм каналдардын бириндеги мигранттардын баракчасында «Азаматтар, мындай кылууга чоң дух керек, кармалып калышканы өкүнүчтүү» деп жазганы үчүн үч жылга эркинен ажыратылды.
Бекзат Россия Федерациясынын Кылмыш-жаза кодексинин 205-беренесинин 2-бөлүгүндө каралган кылмышты жасагандыгы үчүн (терроризмге чакырык жасоо үчүн) күнөөлүү деп табылды. Ал үч жылга жалпы режимдеги түзөтүү колониясына эркинен ажыратылсын», — деп айтылат өкүмдө.
Мындан тышкары, сот ага эки жылга интернетке кирүүгө тыюу салып, кылмыш жасаган уюлдук телефонун мамлекеттин пайдасына конфискациялады. Ошондой эле сот аны камакка алуу учурунда алынган телефон сим-картасын жок кылууну буйруду.