Президенттин Администрациясынын жетекчисинин орун басары Азамат Кадыралиев жана юстиция министри Аяз Баетов 29-майда маалымдагандай, мамлекеттик кызмат системасын дебюрократиялаштыруу боюнча атайын комиссиянын үчүнчү жыйыны 30-майда өтөт.
Алардын айтымында, учурда 60 долбоор боюнча иштер жүрүп жатат. Анын үчтөн бири — мыйзамдар, дагы үчтөн бири — токтом жана жарлыктар, ал эми 25 пайызы — мекемелердин буйруктары болуп саналат.
Министр Баетов мамлекеттик органдар тарабынан демилгелерге карата каршылык болуп жатканын белгилеп, бул тууралуу комиссиянын жыйынында кеңири баяндама жасаларын айтты.
«Биз мамлекеттик органдар тараптан каршылыктарды байкадык», — деди Баетов. Ал мисал катары Монополияга каршы кызматты келтирди: «Эмне менен алек экендери так түшүнүксүз. Аларды же таркатуу керек, же болбосо башка дагы функцияларды кошуп ишин жакшыртуу зарыл», — деп билдирди министр.