Иса Ахунбаев атындагы Кыргыз мамлекеттик медициналык академиясында медицина илимдеринин кандидаты, Саламаттык сактоонун отличниги, Жазуучулар союзунун мүчөсү Касымбек Тазабековдун 90 жылдыгына арналган “Жаш балдардын травмотология жана ортопедиясына арналган актуалдуу маселелер” аталышындагы илимий-практикалык конференция өтүүдө. Бул тууралуу “Кыргыз Туусу” гезитинин кабарчысы Султанбек АМАНБЕК уулу жеринен билдирди.
Аталган конференцияга 12 өлкөдөн 70тен ашуун коноктор катышууда. Алар жаш балдардын ортопедия жана травмотологиясына байланыштуу докладдарды жасашууда.
“Бул конференция кыргыздан чыккан биринчи илимдин кандидаты, балдар ортопеди Касымбек Тазабековдун 90 жылдык элесине арнап өткөрүп жатабыз. Ушул киши балдар ортопедия тармагын түптөп, бизге калтырып кетиптир. Биз анын ишин улантып, алдыга жылдырып жатабыз. Балдар ортопеддеринин иши оор, анткени бала 18 жашка чыкканча ошолор карайт. Кыргызстанда мыкты ортпопед-травмотологду өстүрүү үчүн 15-20 жыл керек. Бул багытта азырынча учубуз кур эмес”, — деди иш-чаранын уюштуруучуларынын бири Сабырбек Жумабеков.
