Кыргызстанда 2030-жылга чейин орточо айлык акы 62 миң сомго чейин өсөрү күтүлүүдө. Бул тууралуу Каржы министрлигинин болжоолорунда айтылат.
Маалыматка ылайык, орточо эмгек акыны жыл сайын орто эсеп менен 2,9%га жогорулатуу каралууда. Ошондой эле калктын акчалай кирешеси ылдамыраак темп менен өсүп, анын реалдуу өсүшү жыл сайын 6,7%ды түзмөкчү. Натыйжада 2030-жылы жалпы киреше көлөмү 1,79 триллион сомго жетет.
Министрлик жакынкы жылдары жакырчылык деңгээли жылына орточо 1,1%га төмөндөйт деп эсептөөдө. Калктын өсүшү жылына орто эсеп менен 146,5 миң адамга көбөйөрү болжолдонууда.
Экономикалык өнүгүүнүн көрсөткүчтөрү да оң динамикада:
-
2026-жылы киши башына ИДП болжол менен 3,1 миң долларды түзсө,
-
2030-жылга карата бул көрсөткүч 5 миң доллардан ашат.
Мындан тышкары, жашоо минимумунун көлөмү да 2026-жылдагы 8 990 сомдон, 2030-жылы 11 148 сомго чейин көтөрүлөрү күтүлүүдө.