Ооганстандын түндүгүндө катуу жер титирөө болуп, анын кесепетинен кеминде 20 адам каза болуп, 300дөн ашуун киши жаракат алды. Бул тууралуу өлкөнүн Саламаттык сактоо министрлиги билдирди.
Жер титирөөнүн магнитудасы 6,3 болуп, анын очогу Мазари-Шариф шаарынын жанында болгон. Бул шаарда болжол менен 520 миңге жакын адам жашайт.
Афганистандын өзгөчө кырдаалдар агенттигинин өкүлү Юсаф Хаммаддын айтымында, көпчүлүк жабыркагандар жеңил жаракат алып, биринчи медициналык жардамдан кийин үйлөрүнө чыгарылган.
АКШнын Геологиялык кызматынын баалоосуна караганда, кырсыктын курмандыктарынын саны дагы көбөйүшү мүмкүн, анткени айрым тоолуу жана жетүү кыйын болгон аймактарда байланыш начар.
Жер титирөөнүн силкинүүсү Тажикстанда, Өзбекстанда жана Түркмөнстанда да сезилди.
Ооганстандын Коргоо министрлиги маалымдагандай, Балх жана Саманган провинцияларына издөө-куткаруу топтору жөнөтүлдү.
Мазари-Шариф шаарындагы белгилүү Көк мечит (Голубая мечеть) да жер титирөөнүн таасирине кабылган. Бийликтердин айтымында, мечиттин дубалынан бир нече кыш кулап түшкөн, бирок имараттын жалпы түзүлүшүнө олуттуу зыян келбеген.