Президент Садыр Жапаров алдамчылык аракеттерине жана соттун чечимдерин аткарбоого каршы жазаларды күчөткөн мыйзамга кол койду. Бул тууралуу президенттин администрациясы маалымдады.
Мыйзам 2025-жылдын 25-сентябрында Жогорку Кеңеш тарабынан кабыл алынган. Анын максаты — алдамчылыкка каршы күрөштү күчөтүү, жарандар менен юридикалык жактардын укуктарын коргоону жакшыртуу.
КР Кылмыш-жаза кодексине киргизилген өзгөртүүлөргө ылайык:
Алдамчылык кылмыштары (КЖКнын 209-беренеси) кылмыштын жаңы квалификациялык белгилери менен каралат: интернет аркылуу жасалган, эки же андан көп адамга карата жасалган, же кызматтык абалын пайдалануу жолу менен жасалган.
КЖКнын 58, 88 жана 92-беренелерине өзгөртүүлөр киргизилип, кылмыш жоопкерчилигинен бошотууга же шарттуу түрдө мөөнөтүнөн мурда бошотууга жол бербөө белгиленди.
Сот чечимдерин аткарбоо үчүн (КЖКнын 370-беренеси) жаза 500дөн 1000 эсептик көрсөткүчкө чейинки айып пул же 3–5 жылга чейин эркинен ажыратуу түрүндө каралган.