Кыргызстанда Бишкектеги көп кабаттуу үйлөрдүн айланасындагы жер тилкелерине жеңил курулуштарды орнотууга тыюу салынды. Бул тууралуу Курулуш, транспорт жана архитектура министрлиги билдирди.
Министр Нурдан Орунтаев кол койгон чечим көп кабаттуу үйлөрдүн жашоочуларынын кайрылууларынан улам кабыл алынган.Бийликтин негизги максаты — шаардын көркүн сактап, уруксатсыз курулуштардын башаламандыгын токтотуу.
Эми көп кабаттуу үйлөрдүн айланасында күркөлөр, темир конструкциялар, унаа токтотуучу жайлар жана башка убактылуу же жардамчы курулуштарды орнотуу мүмкүн болбойт. Жалгыз суу сатуучу автоматтарга уруксат берилет.
Ошондой эле тиешелүү мекемелерге жаңы уруксаттарды берүү жана мурда берилген уруксаттарды узартуу убактылуу токтотулду. Бул чаралар атайын тартип жөнгө салынган документ күчүнө киргенге чейин күчүндө болот. Талаптардын аткарылышын Мамлекеттик архитектуралык-курулуш көзөмөл департаменти көзөмөлдөйт жана мыйзам бузулса тиешелүү чара көрүлөт.