Кыргызстанда биринчи класска кабыл алуу өнөктүгү уланууда. Ачык маалыматтар порталы 1mektep.edu.gov.kg сайтынын маалыматына ылайык, учурда 50 миңге жакын бала 1-класска кабыл алынган.
Бишкек шаарында 8 миң 400гө жакын бала катталып, алардын ичинен кыргыз тилиндеги класстарга дээрлик 3 миң 400 орун, ал эми орус тилиндеги класстарга 5 миңге жакын орун бөлүнгөн. Ошол эле учурда борбор калаада дагы 18 миңден ашык бош орун бар.
2026/27-окуу жылына карата жалпы квоталардын саны 192 миң 300дү түзөт. Республиканын түштүк аймактарында өзбек жана тажик тилдериндеги класстарга да кабыл алуу жүргүзүлүүдө.
Белгилей кетсек, биринчи класска онлайн каттоо 1-апрелде башталган. Каттоого 2019 жана 2020-жылдары төрөлгөн балдар катыша алышат.
Кабыл алуунун биринчи этабы ата-энеси же мыйзамдуу өкүлү тиешелүү мектептин аймагында каттоодо турган балдар үчүн жүргүзүлөт. Экинчи этап 1-июндан тарта башталып, жашаган жери боюнча каттоосу жок балдар үчүн мүмкүнчүлүк түзүлөт.