Иранда Израилдин пайдасына тыңчылык кылган жана Ислам революциясынын сакчылары корпусунун жогорку өкүлү Хасан Саяд Ходаеини өлтүрүүгө катышкан деп айыпталган Мохсен Лангарнишин 30-апрелде дарга асылды.
Ирандын сот бийлигинин билдирүүсүнө ылайык, Лангарнишин Моссаддын бир нече операциясына көмөктөшкөн. Ал Грузия жана Непалда Израилдин атайын кызматынын өкүлдөрү менен жолугуп, тыңчылык машыгууларынан өткөн.
Лангарнишин 2023-жылы Исфахандагы аскердик заводго дрон менен кол салууга да аралашкан деп айыпталган. Анын үстүнөн берилген үч даттануу четке кагылганын HRANA маалымат агенттиги кабарлады. Агенттикке ылайык, Лангарнишин камакта кысым алдында күнөөнү моюнга алган.
Атасы Масуд Лангарнишин уулу адилетсиз сот жараянынын негизинде өлүм жазасына тартылганын айтып чыккан. Amnesty International уюму Иранда өлүм жазасы саясий куугунтук үчүн колдонуларын сындап келет.