Президент Садыр Жапаров “Борбордун статусу жөнүндө” жана “Ош шаарынын статусу жөнүндө” мыйзамдарга ири өзгөртүүлөрдү киргизүү тууралуу мыйзамга кол койду.
Эми Бишкек жана Ош шаарларынын мэрлерин президент кадрдык резервден дайындайт. Алардын ыйгарым укуктары беш жыл, ал шаардык кеңештин же мамлекет башчысынын мөөнөтүнөн көз каранды эмес.
Мыйзам президентке мэрди бир катар себептер менен мөөнөтүнөн мурда кызматтан алуу укугун берет – жеке билдирүүсүнөн тартып ишенимди жоготконуна жана жетекчиликтин саясатына туура келбегенине чейин.
Мэрдин кызмат ордуна талапкердин жогорку билими, мамлекеттик же муниципалдык кызматта 10 жылдан кем эмес иш стажы (же ага тетелештирилген башкаруу тажрыйбасы), ошондой эле «Кыргызтесттин» сертификаты менен тастыкталган мамлекеттик тилди «ортодон жогору» деңгээлде билүүсү зарыл.