Бүгүн Технопаркта чогултулган «Алтын Казык» ноутбуктарын Агартуу министрлиги аймактардагы бөлүмдөрүнө өткөрүп берди.
«Ноутбуктардын сапары байсалдуу болсун! Алар мугалимдерибиздин ишине жардам берип, балдардын билимине кызмат кылат деп ишенебиз», – деди агартуу министри Догдуркүл Кендирбаева.
Маалыматка ылайык, бул ноутбуктарды үч ай бою Каракол шаарындагы мугалимдер сыноодон өткөрүп, аныкталган кемчиликтери жоюлган. Ноутбуктардын өзгөчөлүгү – анда атайын лицензияланган программасы бар, ал өзүн автоматтык түрдө жаңыртып турат жана коопсуздук мүмкүнчүлүктөрү менен жабдылган. Мугалимдердин күнүмдүк ишине керектелүүчү программалар жана методикалык колдонмолор орнотулган.
Жалпысынан 27 031 даана ноутбук аймактарга жеткирилүүдө. Алар салттуу түрдө жаңы окуу жылы башталганга чейин жер-жерлерде өткөрүлүүчү педагогикалык кеңешмелерде STEM предметтеринин мугалимдерине тапшырылат.