Мамлекеттик салык кызматы салык жана эмгек мыйзамдарындагы өзгөртүүлөр боюнча түшүндүрмө берди. Айрым ЖМКларда “накталай төлөмдөргө тыюу салынды” деген маалымат тараган, бирок Салык кызматы бул маалымат чындыкка коошпойт деп билдирди.
29-октябрда кабыл алынган мыйзамга ылайык, өзгөртүүлөр салыктык башкарууну жөнөкөйлөтүү, көлөкө экономикасын азайтуу жана адилет атаандаштыкты камсыз кылуу максатында киргизилген.
Жаңы нормаларга ылайык, 2026-жылдын 1-январынан тарта ишкерлер өз атындагы банктык жана электрондук төлөм каражаттарын жеке муктаждык үчүн колдонсо, жоопкерчиликке тартылат.
Айыптар төмөнкүчө:
-
биринчи жолу – эскертүү;
-
кайталанса – жеке жактарга 50 эсептик көрсөткүч, юр. жактарга 280 эсептик көрсөткүч;
-
бир нече жолу кайталанса – жеке жактарга 130, юр. жактарга 650 эсептик көрсөткүч.
Ошондой эле банктар да салык органдарына маалыматты кеч берүү же бербөө үчүн 650 эсептик көрсөткүчкө чейин айып пул төлөшөт.
“Өзгөртүүлөрдүн максаты — жарандар үчүн коопсуз жана ыңгайлуу эсептешүү шарттарын түзүү, ишкерлерге болгон ишенимди жогорулатуу жана ачык-айкын төлөм системасын өнүктүрүү”, — деп билдирди Салык кызматы.
Ошондой эле мыйзам ишкерлерди QR-коддорду, POS-терминалдарды жана электрондук капчыктарды улуттук стандарт боюнча колдонууга милдеттендирет. Накталай төлөмдөр болсо мурункудай эле калат.
Эмгек кодексиндеги өзгөртүүлөр
2026-жылдан тарта жумуш берүүчү жеке ишкерлер чет элдик кызматкерлерге айлыкты сөзсүз түрдө банк аркылуу төлөшү керек. Накталай төлөө өзгөчө учурларда — банк кызматтары жеткиликсиз аймактарда, сезондук иштерде же өзгөчө кырдаал жарыяланганда гана уруксат берилет.